ERMELO – Die polisie ondersoek ’n saak van strafbare manslag na aanleiding van ’n ongeluk wat om 19:30 op 6 Junie op die Lothair-pad plaasgevind het.

Volgens kapt. Carla Prinsloo, die Ermelo-polisiewoordvoerder, was ’n silwer Toyota Avanza en ’n groen Volkswagen Golf in die botsing betrokke.

Die bestuurder en een passasier van die Avanza asook die bestuurder en ’n passasier van die Golf was in hul onderskeie voertuie vasgekeer.

Hulle is op die toneel dood verklaar.

Prinsloo sê dat daar nog passasiers beserings opgedoen het; drie ernstig en vyf ander ligtelik. Hulle is na die Ermelo Provinsiale Hospitaal vervoer.