Wyle bekende inwoner (91) sal onthou word vir sy humor en lag
Hy het altyd ’n bemoedigende woord vir elkeen wat oor sy pad gekom het, gehad
Oom Apie Robbertse (91), wat 47 jaar in Kempton Park gebly het, is op 17 November na ’n kort siekbed oorlede.
Hy was bekend en geliefd onder baie inwoners van Kempton Park, Brentwood Park, Bonaero Park en Benoni, het sy dogter Barbara Pelser gesê.
Hy was in ’n stadium ook ’n polisiereservis.
“Hy was ’n diep mens, maar sy sin vir humor en sy lag was waarvoor hy die bekendste was. Hy het altyd ’n bemoedigende woord vir elkeen wat oor sy pad gekom het, gehad. Hy was ook diep gelowig en het altyd gesê mens moet net glo met jou hele hart,” het Pelser bygevoeg.
Hy en sy vrou Niena was 56 jaar getroud en het vier kinders, een dogter en drie seuns.
“Ons mis sy teenwoordigheid en wysheid, asook al die spookstories en plaasstories. Hy laat ’n baie groot leemte, maar ons weet hy is in God se teenwoordigheid. Tot ons weer ontmoet, Paps,” het Pelser gesê.
