Die netbalseisoen het op die bane van Laerskool Kenmare afgeskop met hul eerste wedstryd van die jaar teen Laerskool Protearif. Hierdie vriendskaplike ontmoeting het op 24 Februarie plaasgevind.

Volgens Kenmare se netbalorganiseerder, Chantel van der Merwe, het die o10- tot o13B- en C-spanne van Kennies teen die o10- tot o13A- en B-spanne van Proties meegeding.

Lees hier: ’n Oggend vol vermaak vir ’n goeie saak

“Daar is agt wedstryde gespeel, waarvan ses gewen is, een onbeslis geëindig het en een verloor is,” het sy meegedeel.

Van der Merwe beklemtoon dat die hoogtepunt van die dag die goeie sportmanskap teenoor beide opponente en skeidsregters was.

“Al die spanne het deursettingsvermoë getoon – hetsy in oorwinning of nederlaag. Ons benut vriendskaplike wedstryde om elke dogter genoeg geleentheid te gee om haarself te bewys, kombinasies te toets en te verseker dat ons spanne regverdig en verantwoordelik saamgestel word,” het sy bygevoeg.

Sy sluit af: “Die ware hoogtepunt van ons laerskool-netbal lê nie slegs in die telling op die telbord nie, maar ook in die groei, spanwerk en trots waarmee ons dogters hul skool verteenwoordig.”