[KYK] AfriForum-teenboelieveldtog besoek Laerskool Muldersdrif
Dié veldtog skep bewustheid oor afknouery in skole.
Die burgerregte-organisasie AfriForum se teenboelieveldtogspan het in Oktober by Laerskool Muldersdrif besoek gaan aflê.
Dié veldtog skep bewustheid oor afknouery in skole.
“AfriForum wil met sy teenboelieprojek saam met leerders, onderwysers en ouers werk om afknouery in skole hok te slaan en die betrokke partye met die nodige kennis toe te rus om dit reg te kry. Tydens ons besoek verduidelik ons aan leerders wat die verskil tussen afknouery en konflik is, omdat baie leerders hierdie twee konsepte met mekaar verwar.
Dit is belangrik dat leerders weet dat afknouery iets is wat op ’n herhalende, deurlopende wyse plaasvind en dat dit opsetlike gedrag is. Ons wil kinders aanmoedig om ander te behandel soos hulle sélf behandel wil word, om hul eie identiteit te koester en om so ook wedersydse respek teenoor ander se identiteit te toon. Ons praatjie fokus dus nie net op die slagoffers van afknouery nie, maar ook op die afknouer en die omstanders wat betrokke is. Ons bewusmakingsvideo leer leerders meer van die verskillende vorme van afknouery, waaronder fisiese, emosionele, verbale en kuberafknouery,” het Leandie Bräsler, AfriForum se koördineerder vir leierskapsontwikkeling verduidelik.
AfriForum se teenboeliegids bevat raad aan ouers, onderwysers en leerders. Dit bevat ook regsadvies wat deur Daniel Eloff van Hurter Spies geskryf is, asook die verhale van bekendes wat ook afgeknou is, soos Donnalee Roberts, Ivan Botha en Chris Chameleon. Die gids bevat aktiwiteite wat kinders meer bewus maak van wat afknouery werklik is.
“Bewusmaking van afknouery is om twee redes belangrik: Eerstens om kinders te leer om te kan onderskei tussen regte en verkeerde optrede, en tweedens om die afknoukringloop te verbreek. Ons moet die keuse maak om te sê dit stop by ons, sodat dit beter word vir ons kinders en hul kinders,” het Pieter van Zyl van School of Life gesê.
“Laerskool Muldersdrif poog om leerders bewus te maak van wat afknouery werklik beteken en moedig hulle aan om nie stil te bly nie. Leerders het ’n wanindruk van die betekenis. Boonop word kinders ook deesdae weens sosiale media so maklik slagoffers van afknouery. Daarom ondersteun ons AfriForum se teenboelieveldtog en waardeer hul bereidwilligheid om saam met ons teen hierdie onaanvaarbare gedrag te veg,” het Johané van Niekerk, ’n onderwyseres by die Laerskool Muldersdrif gesê.
Stuur ’n epos aan leandie.brasler@afriforum.co.za as jou kind se skool by dié veldtog en leierskapsontwikkeling betrokke wil raak. Volg gerus die skakel na teenboeliegids: https://www.afriforum.co.za/wp-content/uploads/Teenboeliegids_Digital.pdf
Do you perhaps have more information pertaining to this story? Email us at krugersdorpnews@caxton.co.za (remember to include your contact details) or phone us on 011 955 1130.
For free daily local news on the West Rand, also visit our sister newspaper websites
Remember to visit our Facebook, Twitter and Instagram pages to let your voice be heard!
