Die vraag was, hoe kies mens die top 10 atlete in elke ouderdomsgroep in ‘n skool met honderde leerlinge, en maak dit terselfdertyd pret en nie te tydrowend nie?
Die antwoord, het Noordskool besef, was om ‘n massalandloopdag te hou. Maar waar kom die pret dan in, behalwe om om die skoolgronde saam met maatjies te hardloop?
Op Vrydag, 31 Mei kon die leerders skool toe gaan in kleurvolle uitrustings. Superman, Wonder Woman, Spiderman, Batman en vele ander superhelde het op die pawiljoen op die sportterrein bymekaar gekom, en die opwinding was groot.
Die straathoeke is beman deur sekuriteitspersoneel, die hek van die sportterrein is oopgemaak en die leerders is losgelaat. Die superhelde het volstoom om die skool gehardloop met skouermantels wat in die wind gewapper het. Die voorlopers het gou die afstand van omtrent ‘n kilometer om die skool kafgedraf.
Die eerste klompie helde wat weer deur die skool hek ‘gevlieg’ gekom het, het gekwalifiseer vir die eerste landloopkompetisie van die seisoen wat op Vrydag, 19 Julie aangebied word.
