Dit was onlangs ‘n jolige dag by Kwaak-Kwaak kleuterskool toe onnies, kleuters, en oudleerders asook twee narre saam die skool se 30e bestaansjaar gevier het.

Die News het die vieringe bygewoon en na hul geskiedenis gekyk. Heidi Clements, die skoolhoof het verduidelik dat haar ma, Greet Frank, haar Hoër Onderwysdiploma voltooi het en by Laerskool Paardekraal gewerk het.

Kyk hier:

Hulle is vyf kinders en mettertyd het Greet besluit om eerder haar eie speelgroepie te begin. Die speelgroepie het so gegroei dat sy ‘n perseel in Buitenstraat gehuur het en haar eie kleuterskool, Kwaak-Kwaak is op 20 September 1990 geopen. Oor die jare kon Greet die perseel langs haar huis koop en Kwaak-Kwaak het soontoe geskuif.

Greet het haar kleuteronderwysgraad later deur Unisa voltooi en het die perseel langs haar eie huis gekoop. Dit is waar Kwaak-Kwaak deesdae is.

Op Vrydag, 18 September het die skool hul verjaarsdag gevier soos hulle elke jaar doen, het Heidi vertel. Die 36 kinders is vermaak deur Biebie en Bop, twee narre wat hulle met kulkuns en grappies vermaak het.

Daarna het al die leerders in die tuin partytjie gehou en koek geëet. Al die kinders het ook vir hulself verjaarsdagkrone gemaak wat hulle dié dag kon dra.

Greet het natuurlik nie net ‘n gewone kroon gehad nie maar ‘n goue een, want sy verjaar saam met haar skool. Sy het op 20 September 70 jaar oud geword en ook ‘n kaartjie en ‘n groot bos blomme van die kinders en personeel ontvang.

Heidi het vertel hoe lekker dit vir hulle is dat van die kinders wat in hul klein skooltjie was toe hy ontstaan het, nou self ouers is wat hul kinders ook Kwaak-Kwaak toe stuur. Omdat die dag so spesiaal is, het die leerders ook hul landslied en hul skoollied uit volle bors gesing.