Op die herdenking van die dag waarop ‘n tornado verwoesting by Laerskool Protearif gesaai het, het die Proties-familie besluit om terug te gee aan die gemeenskap.
Op Vrydag, 9 Oktober, het hulle ‘n bloedskenkgeleentheid by hul skool gehad wat hul stoutste verwagtinge oortref het.
Die geleentheid is deur Martha Viviers, ‘n Protie-ouer en Lorraine Snyman, die skool se adjunkhoof gereël.
Martha het verduidelik hoe die gemeenskap hulle bygestaan het nadat die tornado die skool drie jaar gelede getref en groot dele daarvan vernietig het.
“Hierdie is ons manier om terug te gee aan die gemeenskap,” het sy gesê.
Pamflette is voor die geleentheid uitgedeel sodat soveel moontlik personeel en ouers kon gaan bloed skenk. Hul mikpunt was 80 eenhede bloed.
Teen Vrydagoggend het reeds 105 mense belowe dat hulle sou skenk, en aan die einde van Vrydag kon die skool met trots sê dat 117 eenhede bloed geskenk is.
“Ons wil graag ander skole in die omgewing uitdaag om dieselfde te doen en te kyk hoeveel hulle kan insamel,” het Martha gesê.
Die Suid-Afrikaanse Nasionale Bloeddiens het juis onlangs aangekondig dat daar ‘n bloedtekort is.
Besoek hul webwerf vir meer inligting en om ‘n mobiele bloedskenkgeleentheid te bespreek. Skakel gerus ook hul inbelsentrum by 0800 11 9031.
