‘n Belangrike deel van die Norie-ondervinding was nog altyd die ouers se betrokkenheid by die skool.
Dit is nou al amper ‘n volle sewe maande sedert Suid-Afrika se grendeltyd begin het en ouers minimaal tot geen toegang tot die skoolgronde gehad het nie.
Hoërskool Noordheuwel het een laat Vrydagmiddag weer vir die ouers ‘n smakie van die skoolkultuur gegee, al was dit binne streng perke om die gesondheid en veiligheid van almal te verseker. Nog voor die gebeure om 5nm begin het, het talle voertuie die linkerbaan in Belllaan van die skool se dienshek tot by die kruising in die pad af volgestaan.
Ouers was gretig om deur die skool te ry en hul ondersteuning vir dié fondsinsamelingsprojek te wys. Hoërskool Noordheuwel het gehoop om R30 000 in te samel, maar dié doelwit is binne net twee uur ver oortref.
Ouers het stadig deur die skoolterrein gery en by bepaalde punte gestop. By die eerste hek is hulle deur ‘n paar onderwysers en Norie-rugbyspelers begroet, en die cheerleaders het hulle vermaak terwyl hulle in die lang tou gewag het. Vandaar het onderwysers in kleurvolle tutus hul kaartjies deur die venster geneem en bottels koeldrank in ruil daarvoor gegee.
By die volgende stop, links van die klaskamers en regs van die hokkieveld was daar iemand in ‘n oranje tronkoorpak in ‘n hok. Norie-hoof, Dawie Kriel is vroeër die dag deur die Norie-raad gevange geneem en deurgaans daar opgepas. Hulle sou hom net vrylaat indien besoekers die losprys sou betaal aan raadslede wat met insamelingsblikkies tussen die voertuie deurgestap het.
Daarna het die ouers kaaskoek of sjokoladekoek ontvang, en verby die rugbyveld en ander geboue gery waar die skool se fietsryers en kultuurleerlinge hulle begroet het. By die laaste stop het die Norie-mansonderwysers varsgebraaide wors op broodrolle geplaas, wat die Norie-damesonderwysers aan die ouers oorhandig het.
Vir hierdie sogenaamde BBP (boereworsrol, bottel koeldrank en poeding) het die ouers R50 betaal, en die opbrengs van die geleentheid gaan gebruik word vir die skool se program vir behoeftige ouers.
