Dit blyk dat 2020 die jaar vir liefdadigheid is.
Laerskool Krugersdorp-Noord se personeel was goed verbaas toe hulle onlangs een van hul jaarlikse kosinsamelings gehou het. Dit is elke slag ‘n groot sukses, maar hierdie jaar het hulle skaars geweet waar om al die blikkies, pakkies en bokse te bêre.
Onderwyser Quintin Botha se klaskamer is binne ‘n week twee maal so volgepak dat die goedere stoor toe verskuif moes word.
Op Vrydag, 13 November, nadat die insameling veronderstel was om te eindig, het die kosskenkings steeds ingestroom. Onderwyser Adéle Claassens het laggend vertel dat sy nog ‘n hoop goedere in haar klaskamer het wat by die ander gevoeg moet word, tot Quintin se groot verbasing.
Dit blyk dat die Noordskool-gemeenskap hierdie jaar hul harte selfs groter oopgemaak het as tevore. Die doel van hierdie insameling is om 41 gesinne van die skool deur hierdie moeilike tyd te help deur vir hulle ‘n maand se kos anoniem te voorsien.
Goedere soos meel, suiker, koffie, poeiermelk, verskeie blikkies kos, pasta, kitsnoedels, broodsmeer, seep en meer is in ‘n redelik stewige boks met ‘n deksel geplaas. Nadat een boks vir elke gesin gepak is, was daar nog baie produkte oor.
Leë kruideniersakke is bymekaargemaak en met die ekstra produkte gevul om as iets ekstra vir die gesinne te dien. Só kon die Nories trots wees op die feit dat hulle meer kon gee as waarvoor hulle aan die begin van die projek gehoop het.
Die skool sal binnekort ander oorblywende produkte, soos die groot sakke meel, aan ‘n organisasie skenk, alhoewel hulle steeds al die opsies oorweeg.
