Die heel eerste dag van ‘grootskool’ is dikwels oorweldigend vir die nuwe graadeentjies.

Dit is ‘n dag van opwinding en vele gebeurtenisse wat soms te veel kan wees vir ‘n kleintjie om op een slag in te neem. Die Graad 1-verwelkoming is gewoonlik op die eerste amptelike skooldag, maar die Nories doen dinge dié jaar anders.

In ‘n jaar waarin soveel dinge omvêr gegooi is, het Laerskool Krugersdorp-Noord reeds aanstaande jaar se Graad 1-leerders en hul ouers op Donderdag, 3 Desember by die skool verwelkom.

So kon die leerders in hul klasse ingedeel word, hul nuwe onderwysers ontmoet, die klaskamer bekyk, sien waar hulle gaan sit en inligting ontvang oor hoe die komende jaar gaan werk.

Die idee is dat wanneer hulle op 27 en 28 Januarie begin met klas, baie van die onsekerheid en die druk van die eerste dag baie ligter sal wees. Noordskool het vir hul nuwe Nories ‘n verwelkomingspakkie saamgestel met ‘n aktiwiteitboek waarin hulle kan inkleur en speletjies speel, ‘n paar woord- en klanklesse, en inligting oor wat hulle alles vir die nuwe jaar nodig het.

Daarna kon hulle saam met hul ouers huis toe gaan om te rus en te speel. ‘n Paar van die kleintjies het selfs maats gemaak tydens die verwelkoming en besluit om na skool verder te kuier. Die leerders is gelukkig en tevrede daar weg, slaggereed vir die nuwe jaar.