Die bejaardes van Residentia Moria is onlangs bederf met ‘n oggend van skaterlag, ‘n reis deur die modes van die eeue, en ‘n spesiale vertoning deur Donna Viljoen, ‘n jarelange inwoner van Krugersdorp en bekende orrelis.

Die ‘modelle’ – ‘n kombinasie van inwoners, personeel en vrywilligers by die huis vir bejaardes – het rokke uit Donna se klerekas gedra tydens hul modeparade op Donderdag, 11 Februarie.

Donna het reeds in Graad 1 begin musieklesse neem en het haar finale klaviereksamen deur die Royal School of Music van Londen geslaag. Sy is later gekeur om met orrelopleiding by die Raad van Kerkmusiek te begin, ‘n kursus wat drie jaar sou duur. Die Nederduitsch Hervormde Kerk (NHK) het ‘n beurs vir die kursus aan haar toegeken op voorwaarde dat sy vir drie jaar as orrelis in die NHK moes diens doen.

In Desember 2020 het sy afgetree na 60 jaar as orrelis in die NHK Krugersdorp-Oos.

Sy het ook in hierdie tydperk klavier-, orrel- en klassieke trekklavierlesse aangebied.

“As jy van jou werk hou, hoef jy nooit te werk nie,” het sy vertel.

Die modeparade het begin met die jaar 1851 en die modelle het bloemers gedra soos dié wat deur die Amerikaner Amelia Bloomer ontwerp is. Daar was modes uit die 1920’s en rokke waarin vroue die Charleston gemaklik kon dans, en swemklere uit die vroeë 1900’s.

In die 1960’s het roksome begin opbeweeg en die mini is vir die eerste keer in 1965 gedra. Volgende was dit die 1970’s en die era van krimpelien. Die laaste modes wat vertoon is was uit die 1980’s en selfs ‘n paar trourokke het dit ook tot op die loopplank gemaak.

Die oggend is afgesluit met ‘n geskenkie aan elke model en lekker peuselhappies vir die gehoor.