Die opskrif “Duiker dood van die honger in grot” klink soos ’n onlangse tragedie, maar dié merkwaardige verhaal het meer as 40 jaar gelede in Krugersdorp afgespeel.

Volgens Anton Jacobs, voorsitter van die plaaslike grotverkennersgroep Potch Potholers, het die grotduiker Peter Verhulsel in 1984 verdwyn terwyl hy die ondergrondse meer in die Sterkfontein-grotte verken het.

Sy liggaam is weke later gevind nadat hy na bewering sowat drie weke lank in die grot oorleef het voordat hy weens honger en blootstelling gesterf het.

Jacobs sê die verhaal het landwyd bekend geword en word steeds internasionaal in artikels, podsendings en YouTube-video’s vertel.

• Lees ook: Sterkfontein Caves: Revisiting the 1984 cave diving tragedy

Hy wys ook op ’n ander onopgeloste grotverhaal uit sowat 30 jaar vroeër, toe ’n jong man met die van Baldwin in ’n grot naby Johannesburg verdwyn het. Sy liggaam is nooit gevind nie.

Dié verhale kry nuwe relevansie met die eerste Internasionale Dag van Grotte en Karst op 13 September, wat deur Verenigde Nasies se organisasie vir onderwys, wetenskap en kultuur (Unesco) geproklameer is.

Jacobs beklemtoon dat Suid-Afrika oor ’n besonderse ondergrondse erfenis beskik, met onder meer die Sterkfontein-, Swartkrans- en Kromdraai-gebiede in die Wieg van die Mensdom.

Volgens hom verken grotverkenners steeds onbekende gange, karteer grotte, dokumenteer ontdekkings, help met bewaring en neem aan reddingsoperasies deel.