Afrikaans in die Wolke lok sowat 8 000 na Noordheuwel
Hoërskool Noordheuwel se gewilde musiekfees het vanjaar sowat 8 000 mense gelok, met groot name soos Bok van Blerk, Steve Hofmeyr en Snotkop op die verhoog.
Afrikaansmusiekliefhebbers het op 12 September na Hoërskool Noordheuwel gestroom vir die jaarlikse Afrikaans in die Wolke-musiekfees.
Groot name in die Afrikaanse musiekbedryf, waaronder Bernice West, Bok van Blerk, Steve Hofmeyr, Snotkop, Early B, G-String en Zaan Sonnekus het die verhoog gedeel tydens die geleentheid, wat vanjaar ook deel was van die skool se 45ste bestaansjaarvieringe.
Volgens Norie-hoof, Dawie Kriel, was dit ’n voorreg om die fees aan te bied en soveel mense op die skoolterrein te sien saamkuier.
“Die atmosfeer om soveel mense te hê en te sien hoe hulle dit geniet, was definitief die hoogtepunt vir my,” sê Kriel.
Die skool bied die fees sedert 2017 aan. Wat aanvanklik as ’n fondsinsamelingsgeleentheid begin het, het volgens Kriel oor die jare tot ’n gevestigde gemeenskapsfees gegroei.
Hy sê die geleentheid word nou deur die breër Krugersdorp-gemeenskap ondersteun en is nie meer uitsluitlik ’n Noordheuwel-geleentheid nie.
Meer fotos hier:
