Laerskool Krugersdorp-Noord se verhoog het van 14 tot 18 September behoorlik lewe gekry met die skool se jaarlikse revue, Droomspeelgoed.

Sowat 750 leerders van graad een tot graad sewe het aan die produksie deelgeneem, wat met ’n spesiale Oupa-en-Ouma-oggend afgeskop het.

Volgens die revue-regisseur en organiseerder, Quintin Botha, vertel die produksie die verhaal van Timmie, ’n graad sewe-seun wat aan die einde van sy laerskoolloopbaan terugdink aan die speelgoed en herinneringe wat sy lewensreis gevorm het.

“Elke fase van Timmie se lewe is deur sy ‘lewende’ speelgoed uitgebeeld,” verduidelik Quintin.

Die produksie is verder gekenmerk deur kreatiewe dekor, beligting, klank en kostuums. Botha het die teks geskryf en die produksie behartig, met ’n groot span onderwysers, leerders en tegniese personeel wat agter die skerms saamgewerk het.

Al sewe vertonings was uitverkoop. Volgens Quintin getuig dit van die gemeenskap se groot ondersteuning.

“Droomspeelgoed was meer as net ’n revue – dit was ’n ongelooflike avontuur om ’n droom aan die lewe te bring,” sluit hy af.