Laerskool Kenmare kan met trots terugkyk op ‘n uiters suksesvolle 2026-netbalseisoen waartydens spelers deurgaans groei, toewyding en uitstekende sportmanskap getoon het. Die seisoen is met indrukwekkende prestasies op liga- én provinsiale vlak afgesluit.

Volgens Peter du Toit, hoof van sport, kultuur en bemarking by Kennies, was dit een van die skool se sterkste netbalseisoene in onlangse jare, met verskeie spanne en spelers wat hulself op hoë vlak onderskei het.

Die o12B-span het die ligaseisoen as ligawenners afgesluit, terwyl die o12A- en o13A-spanne direk vir die Gauteng Kampioenskappe gekwalifiseer het.

By die kampioenskappe het die o12A-span die 18de plek in Gauteng behaal, terwyl die o13A-span die toernooi as die 14de beste span in die provinsie afgesluit het.

“Die grootste hoogtepunt was beslis dat beide die o12A- en o13A-spanne direk na die Gauteng Kampioenskappe deurgedring het. Dit is ‘n besondere prestasie waarop ons baie trots is,” het Du Toit gesê.

Op individuele vlak is Jaime Kruger en Zariah Maritz gekies om Gauteng by die All Ages-toernooi, wat van 28 Junie tot 2 Julie plaasgevind het, te verteenwoordig.

Volgens Du Toit is daar ook verskeie ander spelers wat met hul vertonings gewys het dat hulle die potensiaal het om in die toekoms op distrik- en provinsiale vlak mee te ding.

Hy het bygevoeg dat veral die o12- en o13-ouderdomsgroepe vanjaar beïndruk het met hul toewyding, ontwikkeling en prestasies.

“Dit spreek van die gehalte van ons program,” het hy gesê.

Hoewel die netbalseisoen nou afgehandel is, verskuif die fokus na individuele provinsiale verteenwoordiging en voorbereiding vir volgende jaar se seisoen.

Du Toit het afgesluit deur die rol van ouers en ondersteuners te beklemtoon.

“Hul ondersteuning langs die baan, hulp met logistiek en voortdurende aanmoediging speel ‘n geweldige rol in die ontwikkeling en selfvertroue van ons spelers. Ons is baie dankbaar vir die sterk sportkultuur wat hulle help bou.