Die Pumbas het ‘n 33-24 wen op die kerfstok aangeteken teen hulle eweknieë van Nelspruit-rugbyklub en het vyf keer agter die manne van Nelspruit se doellyn gaan kuier.

Jason Roux het ‘n tweekuns aangeteken.

Rudie von Abo en Marcell Basson het ook elkeen ‘n drie gedruk. Losskakel, Erich Ackermann het self ook ‘n drie gedruk en vier van die vyf drieë verdoel om ‘n totaal van 13 punte aan te teken.

Die Pumbas se tweedespan het egter klei getrap en 33-0 verloor teen die tweedespan van Nelspruitrugbyklub.

Voorsitter van die Bosveld Pumbas-rugbyklub, Romeo Jones is ook trots om die span se nuwe borge, Hollywood Bets en NTT Toyota Hoedspruit aan te kondig.

“Ons bedank graag vir Dean Kemp van NTT Toyota en Khanyisa Mkhari van Hollywood Bets vir hulle ondersteuning,” sê Jones.

Also read: Letaba gryp 13-12 oorwinning

Hulle het Saterdag op die veld gedraf in hulle nuut geborgde truie. Spelers wat belangstel om by die Bosveld Pumbas aan te sluit, kan Jones op 083 439 2466 skakel vir meer inligting.

Die Pumbas se eerste- en tweedespan sal Saterdag, 14 Mei in wegwedstryde teen Witrivierrugbyklub in die tweede rondte van die premierliga te staan kom. Die tweedespan speel om 14:00 en eerstespan se wedstryd skop om 15:30 af.

Daarna sal die Pumbas weer op 28 Mei op hulle tuisveld die manne van Barberton-rugbyklub verwelkom in Hoedspruit vir die derde been van die premierliga se wedstryde. Ehlanzeni Laeveld Premierligaskedule 2022:
• 14 Mei – Witrivier vs Pumbas – Nelspruit vs Barberton.
• 28 Mei – Nelspruit vs Witrivier – Pumbas vs Barberton (tuis).
• 4 Junie – Witrivier vs Barberton – Nelspruit vs Pumbas.
• 11 Junie – Pumbas vs Witrivier (tuis) – Barberton vs Nelspruit.
• 18 Junie – Barberton vs Pumbas.
• 25 Junie – Witrivier vs Nelspruit.