Wynand Olivier, Mac Masinga, Grant Esterhuizen, Henno Ments, Ettiene Reynecke en Dave von Hoeslin het Vrydag tyd saam met Tzaneen se gholfspelers spandeer by die Tzaneen Buiteklub.
Liano Viviers en Cornell Jacobs het weggestap met die eersteprys en ‘n Srixon gholfsak en ‘n Miami Canners-geskenkpak gewen. Jeandré Louw en Juan Winter het tweedeprys gevat en ‘n Srixon-toksak en Miami Canners-geskenkpak huis toe gevat.

lees ook: Plasie-rugby wys hulle staal in Landbouskole-toernooi

Derdeprys het aan Bruce Mogg en Cronjé van Staden gegaan. Hulle wen ook ‘n Miami Canners-geskenkpak en ‘n drukkoker.
Saterdagoggend het die SA Rugby Legendes ‘n rugbykliniek aangebied vir o.12- en o.13-rugbyspelers op Hoërskool Ben Vorster se rugbyvelde. Jong spelers van laerskole in Tzaneen en die omliggende areas, asook Polokwane, Makhado en Hoedspruit het by dié kenners die grondbeginsels van goeie rugby geleer.

Oud-Springbok-sewesspeler en afrigter by die Universiteit van Johannesburg, Masinga het die kliniek gelei.
Masinga het klem gelê op goeie besluitneming gedurende ‘n wedstryd soos hoe om onder druk die bal te vang en aan te gee. Die legendes het ook die jongspan geleer om hulle duik-tegnieke te verbeter.
Die kliniek is afgesluit met ‘n kort wedstryd en ‘n speletjie om die beginsels in te oefen waarna hulle saam ‘n hamburgerete geniet het.