Vossie atlete vaar goed by nasionale atletiekbyeenkomste
Ses atlete van die Hoërskool Ben Vorster het tydens die April vakansie onderskeidelik aan die ASA-junior baan- en veld- en die SA-skole atletiekkampioenskappe deelgeneem.
Shaun Roulston, Lara Schutte, Renzo du Plessis en Gustav Prinsloo het aan die SA-skole atletiekbyeenkoms by Kings Park Stadion in Durban deelgeneem.
Shaun het ‘n silwer medalje verower in die SO/15-verspring en Gustav het agtste geëindig in die SO/19-spiesgooi. Lara het ‘n 12de plek behaal in die MO/19-200m en ‘n negendeplek in die MO/19-400m. Renzo du Plessis het sesde geëindig in die SO/15 300m-hekkiesuitdunne en vierde in die SO/15 100m-hekkies uitdunne.
Lara Schutte, James Vorster, Ogievly Ngobeni en Gustav Prinsloo het by die ASA-byeenkoms, wat by die Groenpunt stadion in Kaapstad plaasgevind het, deurgedring na die finale vir hulle items en soos volg presteer:
Lara het ‘n agtsteplek in die 400m vir juniors behaal.
James Vorster was 12de in die spiesgooi jeug-afdeling en Gustav Prinsloo was vyfde in die spiesgooi juniorafdeling.
Ogievly het ongelukkig voor die tyd weggespring in sy 100m uitdunne en is gediskwalifiseer.
