‘n Bejaarde vrou was verheug toe sy verneem het dat die man wat haar drie jaar gelede aangeval het, vir 15 jaar tronk toe gestuur is.

Peter Lucky Siloane is in die streekhof skuldig bevind aan huisroof en betreding na voorvalle in 2014.
Me. Anaat Bell (83) is in Augustus 2014 in haar huis oorval, gewurg en met haar eie knopkierie geslaan.

Siloane is in September 2014 in ‘n polisievrou, sers. Sibongile Bayi, se erf gearresteer, waarna hy deur verskeie klaers positief geïdentifiseer is vir ander sake.

Landdros Andreas Masteroudes was nie tevrede met die manier waarop die uitkenningsparades hanteer is nie en Siloane is net skuldig bevind op ‘n klagte van huisbraak met die opset om te roof (me. Bell) en betreding (sers. Bayi se erf waar hy gearresteer is).

Die twee jaar vir betreding sal samelopend met die 15 jaar uitgedien word.

• Siloane was in die tyd wat hy verhoorafwagtend was, die hele tyd in aanhouding, aangesien hy tydens sy arrestasie uit was op parool vir huisbraak.