Die sentrale sakegebied, veral in die omgewing van die Poskantoor, is ’n misdaadnes en ’n vrou sien daagliks hoe deure oopgeruk en artikels gesteel word.

“Bly uit SADC-straat uit!” het me. Trudie de Lange moedeloos uitgeroep.

Sy het hierdie week ’n paar keer gebel om www.mobserver.co.za te vertel hoe sy sien dat mense slagoffers is van die straatrowers.

Veral die verkeerslig op die hoek van SADC- en OR Tambostraat, die omgewing voor die poskantoor, asook die hoek van SADC- en Walter Sisulustraat is rooi areas.

Donderdagoggend, vóór sewe al, is die eerste slagoffer sy selfoon kwyt toe hy gestop het oorkant die poskantoor.

Me. De Lange sê sy het gesien hoe een boosdoener aan die ander kant van die kar sy aandag aftrek en die een aan die bestuurderskant toeslaan om die man se selfoon te gryp.

“Daar sal iets gedoen moet word. Ons almal sien presies daagliks wat gebeur. As die polisie se berede eenheid aankom, dan verdwyn hulle skielik. Die oomblik wat die polisie verby is, peul hulle net weer oral uit!”

Sy en vele ander sakelui is van mening dat die polisie in ongemerkte voertuie en privaatdrag patrollies sal moet begin doen, want “dit word net erger en erger!”

• Me. De Lange het haar ook uitgespreek omdat daar nie opgetree word teen die mense wat in die taxistaanplekke Temik en ander gif verkoop nie.