Mnr. Thabang Nakana het Donderdagoggend vertel dat hy Woensdagaand vanaf Dennilton se rigting oppad was Middelburg toe. Sy vrou, Thandeka, was by hom in die kar.

Sowat twee kilometer voor die T-aansluiting (naby die Loskop Damwal winkelsentrum) het daar skielik ‘n reuse dier oor die pad gehardloop en hy het hom met sy VW Polo getref.

Mnr. Nakana kon sy oë nie glo nie en het uitgeklim om te kyk watter skade daar aan sy kar is en waar, wat vir hom gelyk het na ‘n leeu, lê.

Op hierdie stadium het ‘n motoris, wat agter hulle gery het, langs hom gestop en hom beveel om terug te klim in die kar. Dié motoris het hom meegedeel dat hy gesien het hoe drie ander leeus uit die bosse kom en die dooie dier die bosse insleep.

Ander motoriste het ook nadergery en vertel dat daar gereeld wilde diere op die pad gevind word.

Mnr. Nakana was bekommerd oor die welstand van die “ander leeus” en was bang dat nóg mense in die leeus sal vasry.

Hy is gekontak met die nuus dat slegs ‘n dooie vlakvark deur ‘n joernalis gevind is. Mnr. Nakana het egter voet by stuk gehou dat dit wel ‘n leeu was wat hy getref het.