‘n Vrou, wie se identiteit nie deur die polisie bekend gemaak is nie, het ‘n klag van roof by die polisie gaan lê nadat sy haar handsak en juwele kwyt is in Checkers in die Middelburg Mall.

Kapt. Khanyisile Zwane sê dat die vrou deur iemand genader is terwyl sy besig was om inkopies te doen. Die vrou het beweer dat sy vir die winkel se sekuriteit werk en dat daar boewe is wat vrouens se juwele en handsakke teiken in die winkel.

Met ‘n klomp slimpraatjies en draaitjies wys videomateriaal hoe daar skielik drie vroue om hul teiken is.

Op ‘n stadium hou een vrou twee verskillende produkte op en vra die slagoffer vir raad.

Dan sien jy met verbasing hoe die teiken haar juwele afhaal, dit in haar handsak sit voordat sy dit aan een van die swendelaars oorhandig.

Sodra die vrou weg is met haar handsak, kan jy sien hoedat die slagoffer kriewelrig raak en besluit om haar te volg, maar sy word teruggeroep deur die ander twee vrouens wat agter gebly het.

Toe sy uiteindelik na die ander vrou gaan soek, is sy skoonveld. Die ander twee swendelaars het intussen ook soos mis voor die son verdwyn.

Die polisie waarsku besoekers aan besige winkelsentrums om op hul hoede te wees.

Vat so min as moontlik waardevolle items saam as jy gaan inkopies doen en hou jou goed aan jou as persoon. Moenie sommer vreemdelinge vertrou nie.

Indien iemand die vroue herken of weer raaksien, kontak die Middelburg polisie speurhoof kolonel Phela Mahlangu by 076 942 5455.