Skielik het ’n kar gestop. ’n Jong man het uitgespring, na die burgemeester gestap, sy hand geskud en aangekondig: “Dankie wat jy vir ons dorp doen meneer die burgemeester!”

Dat dit ’n blanke man was, was irrelevant. Dat die burgemeester van die ANC is en in Mhluzi bly was irrelevant. Om die waarheid te sê, wit en swart het nie die oggend bestaan nie. Daar was net een woord: Ons!

En dit is Middelburg: Anders as ander dorpe, vriendelike mense, goeie mense, behulpsame mense, mense sonder rasbrille.

Toe verskyn twee mans Woensdag in die hof wat ’n ander man in ’n doodskis gedruk het.

Elke koerant in die land, elke radio en televisiestasie, die president en meneseregtekommissie het verwys na “die twee mans van Middelburg”.

Skielik word die rassistiese etiket om ons dorp se nek gehang – en ons is dit nie. Soos in elke dorp en stad in hierdie land is daar rassiste. Net soos daar in elke dorp in Amerika ook steeds rassiste is.

Hulle is ’n spikkeltjie in ons groot Middelburg bevolking.

En die mans is ook nie van Middelburg nie – hulle is van twee plase naby Blinkpan – dertig kilometer weg.

Dit is onregverdig dat ons dorp so gebrandmerk word.

Die media wat die rasvlam so aanblaas moet uit hulle kantore in Johannesburg kom en goeie joernalistiek beoefen en kom praat met ons burgemeester en ons mense.

Ons is nie wat die land nou dink ons is nie!