News

Oorlamse inbreker gaan drie keer terug na skool

’n Oorlamse inbreker het gedurende die naweek drie keer teruggekeer na die skool waar hy ingebreek het.

May 4, 2019

Daleen Naudè 2 minutes read

Die dief wat drie keer teruggekeer het na die Middelburg Privaatskool om in die vroeë oggendure artikels te steel.

Dr. Sonna van Zyl, van die Middelburg Privaatskool vir CVO, sê hulle het op videomateriaal gesien hoe die booswig weer en weer teruggekeer het oor die naweek.
Die laaste keer het hy Maandagoggend nog tot omstreeks 05:00 op die skoolterrein rondgesluip.

Hy het toegang tot die perseel gekry deur ’n stuk van die palissade heinig af te saag en om te buig. Hy kon nie bo-oor klim nie, aangesien daar elektriese omheining bo-op die palissade is.
Oor die drie dae het die booswig keer op keer teruggekeer, waar hy onder andere by die rekenaar- en Afrikaanse klas ingebreek het.

Twee rekenaars is gesteel, asook ’n liniaal, ’n onderwyseres se baadjie, luidsprekers en ’n noodhulpsak.

Lees ook: WATCH: Cash reward for sneaky thief

In die rekenaarklas het hy die kameras toegegooi, terwyl die rekenaars gesteel is.

Daar is aanvanklik gedink dat hy alleen te werk gegaan het, maar nadat ure se videomateriaal nagegaan is, is gesien dat iemand hom kom oplaai het.

Alhoewel daar nie kameras is waar hy opgelaai is nie, kan ’n mens op die videomateriaal sien dat die taxi in Zuidstraat stadiger ry. Deur vensters, waar daar videomateriaal is, sien ’n mens dat die voertuig ’n rukkie stop by die area waar hy die palissade oopgesny het en dan kort daarna ry.

Dit is ook duidelik dat daar ’n uitkykvoertuig was voor hy opgelaai is, want ’n sedan stop in Morkelstraat oorkant die skool vir ’n paar minute en sodra die taxi verby beweeg, ry hy ook.

•Die persoon wat ingebreek het, het op ’n stadium direk in die kameras gekyk en lyk presies soos ’n inbreker wat etlike maande gelede vyf keer by dieselfde besigheid ingebreek het. Daar is destyds ’n beloning uitgeloof vir inligting wat sal lei tot sy arrestasie.