Laerskool Uitkyk is hierdie jaar 103 jaar oud. Die skool het ten spyte van talle uitdagings van krag tot krag gegaan. Laerskool Uitkyk se skoolhoof, Corrie Erasmus, is aan die stuur van ’n gedugte span wat deur ’n ywerige beheerliggaam ondersteun word.

Al is daar net ’n handjievol leerlinge, skroom hulle nie om kragte te meet teen groter skole in sportsoorte soos atletiek, tennis, krieket en Pumaki rugby nie. Die skool het ook ’n skaak akademie en hul dogterspan het derde in die Nkangala distrik geëindig.

Van 2020 af sal daar ’n skoolbus wees wat daagliks van Middelburg na Laerskool Uitkyk, sowat 40 km buite die dorp, gaan ry.

Die skool het tydens ’n dinee by Mellow Stream, skenkers tot hul fondsinamelingsprojek ‘Dis mos mielies!’ vereer. Die kompetisie is in samewerking met Monsanto/Dekalb geloods en het behels dat deelnemers die opbrengte van ’n hektaar mielies aan die skool skenk.

Peet LaCock van Monsanto/Dekalb is vereer vir die ondersteuning wat hy die plaasskool bied.

Ernst van der Berg het met die R50 000 eersteprys weggestap. Hy het die helfde van sy prysgeld aan die skool teruggeskenk.

Fondse wat tydens die kompetisie ingesamel is, sal gebruik word om twee klaskamers en ’n rekenaarlokaal aan te bou. Die skool beloof persoonlike aandag aan kinders met nie meer as 15 leerlinge per klas nie.