Die voertuig wat gister tydens ’n aanval by ’n huis in Middelburg geroof is, is later die dag verlate op die Stoffergpad gevind.

Me. Whelma du Toit is omstreeks 10:00 deur rowers by haar huis in Eikestraat, Kanonkop, aangeval.

Die rowers het haar ingewag toe sy by die voordeur uitgaan. Sy is só hard met ’n voorwerp agter die kop geslaan en in die gesig geslaan, dat die vel oopgekloof is.

Die booswigte het haar ook met pepersproei in die gesig gespuit.

Sy is in die kombuis op haar maag op die grond laat lê en haar hande is agter haar rug vasgebind.

Nadat hulle die huis geplunder het op soek na waardevolle items, het hulle met haar nuwe Ford Ecosport weggejaag.

Die voertuig is gistermiddag naby die Middelburg Honde-eenheid op die Stoffbergpad gevind.

Kapt. Khanyisile Zwane (polisiewoordvoerder) sê hulle is laatmiddag met die hulp van beriggewers gelei na ’n huis in Tokologo en is die huis deursoek, maar niemand gearresteer nie.

Die polisie is steeds besig om alle leidrade op te volg.