Geskenkhoop groei vir kinders in Noord Kaap
Daar is al 'n groot hoop geskenkies wat toegedraai en in 'n kas gebêre is vir die arm kinders in die Noord Kaap.
Www.mobserver.co.za het onlangs berig oor Middelburger, Soretha Oosthuizen, wat Kersfees 2022 spesiaal wil maak vir hulle. Lees berig hier.
Haar man, Willem, werk in Port Nolloth in die Noord Kaap en tydens ‘n kuiertjie by hom het haar hart gebreek toe sy sien hoe arm die gemeenskap in die omgewing is. Van die kinders se enigste speelgoed was skulpies.
In 2021 het sy lekkergoedpakkies saamgevat en het van die kinders gehuil van dankbaarheid toe sy dit uitdeel.
Vroeg hierdie jaar het sy gemeld dat sy nou al geskenkies vir die kinders gaan bymekaar begin maak en is almal se hulp gevra.
Sy het ook genoem dat sy op ‘n gereelde basis die lesers op hoogte sal hou oor hoe die projek vorder.
Soretha sê sy het reeds heelwat skenkings gekry, van klerasie vir babas tot DVD’s, speelgoed en skryfbehoeftes.
“Enigiets wat kinders van geboorte tot ten minste tienerstadium kan gebruik, kan geskenk word. Ons het selfs haarversierings vir dogtertjies gekry.”
Sy is dankbaar dat daar mense is wat self hul geskenkies toedraai, want dit maak haar werk baie makliker. “Onthou net om op jou geskenkie ‘n kaartjie vas te plak om te sê vir watter ouderdom kind dit is en of dit vir ‘n seun of ‘n dogter is.”
Hulle aanvaar nie kontant nie en vra dat mense eerder ‘n geskenkie (tweedehands is ook welkom) of geskenkpapier skenk.
Haar kinders, Nikita en DJ help haar met die projek. DJ sal dan ook Kersvader wees as hulle die geskenke gaan uitdeel.
•Mense wat betrokke wil raak, kan haar bel by 072 272 5337.
