Www.mobserver.co.za het verneem dat drank ’n groot rol gespeel het in verlede Sondag se aanranding van mnr. Louie van der Ahee op die Hermansdal Landgoed, voordat mnr. Van der Ahee Woensdagaand dood is weens breinbeserings.

Daar is glo by ’n woning by die landgoed gekuier, waartydens die twee beweerde aanvallers betrokke by mnr. Van der Ahee se aanranding, ’n tydlank gewik-en-geweeg het of hulle na sy kamer sou gaan.

’n Broer van een van die beweerde aanvallers het glo vasgeskop teen dié plan.

Nietemin het die twee aanvallers later in ’n voertuig gery na mnr. Van der Ahee se kamer.
Daar is hy na bewering oorval, geslaan en geskop.

Mnr. Van der Ahee se voortande is in die aanval uitgeslaan en sy poniestert met ’n steakmes afgesny.

Na die aanval het die twee mans glo terug gekeer na die huis, waar hulle gedeeltes van mnr. Van der Ahee se afgesnyde poniestert vir mense gewys het.
Mnr. Van der Ahee is Woensdagaand oorlede, nadat die drukking op sy brein weens die aanranding verlig moes word.

Hy het sy bewussyn Dinsdagmore verloor by Pieta’s Pub, oorkant die pad van Hermansdal, waar hy gestop het vir water.
Hy’t vreeslik begin opgooi en toe flou geword, voordat daar met hom hospitaal toe gejaag is.

Die polisie ondersoek tans ’n saak van moord.

’n Verdagte is reeds deur die polisie in verband met die aanval ondervra.

Mnr. Van der Ahee het ook in ’n video gesê dat een van sy aanvallers ene “Brian” is. Dié Brian is nog op vrye voet.