Die koeëlpunt het genadiglik in die dinosourus vasgeslaan, terwyl twee ander koeëlpunte ook in die winkel herwin is.

Winkeleienaar, mnr. Kappie (Frikkie) Kapp, sê dat die winkel se mure ook verskeie koeëlgate het, nadat minstens ses skote op hom en sy vrou, Judy-May, deur Willie Bester, die naburige winkeleienaar van Horlosie Kliniek, afgevuur is.

Hulle is ook met minstens drie petrolbomme bestook maar kon gelukkig sonder besering agter uit hul winkel vlug.

Bester se swaer, Willie Pretorius, van die Brother borduurwinkel reg langs Jud’sies het ook agter uit sy winkel gevlug.
Daar is intussen verneem dat die verhouding tussen Bester en sy suster Petro, onlangs versuur het.

Die aanval Donderdag is op die Kapp egpaar geloods na jare se konflik oor ’n gestremde parkering reg voor hulle almal se winkels by Fountain Corner.

Woensdag het iemand weer op die parkering gestop, wat Bester tot raserny gedryf het.
Hy het ook glo twee maande gelede ’n uitsettingsbevel by die sentrum ontvang.

“Sy winkel was sy heiligdom, sy lewe,” het ’n kennis van Bester oor die naweek aan Middelburg Observer vertel.

• ’n Volledige onderhou met dié kennis, en waarom Bester dalk kop verloor het word in die week se Middelburg Observer gepubliseer.