Tydens die Geloftefeeskomitee se kranslegging in die konsentrasiekampbegraafplaas ter herinnering aan slagoffers, veral vroue, kinders en bejaardes, wat in die Anglo-Boereoorlog gesterf het, het ’n nuuskierige meerkat hom verkyk aan die foto-uitstalling.

Maar nou gaan daardie uitstalling aan ’n veel groter gehoor bekendgestel word.
Rudi van Wyk, voorsitter van die Middelburg Erfenisvereniging, sê die foto’s gaan die volgende paar weke op twee plekke uitgestal word.

Eers by die Vriende van die Anglo-Boereoorlog in Pretoria vanaf 12 tot 14 November en daarna by die Voortrekkermonument van middel November tot einde Januarie.

Hy het lede van die Erfenisvereniging wat die konsentrasiekampfoto’s geborg het, bedank.
Dit is ’n indrukwekkende en aangrypende uitstalling en pluimpie vir die werk wat die Middelburg Erfenisvereniging doen.