’n Plasing op die DA se Gholfsig-WhatsApp-groep kort voor verlede Woensdag se verkiesing het kritiek ontlok oor die verspreiding van verkiesingspamflette in Wyk 14.

In die plasing word inwoners gevra om ’n vrou aan te spreek wat glo rondry en haarself as die wyksraadslid voordoen, eerder as Elsie Vermooten.

“Gee haar ’n heftige boete asseblief!” lui die boodskap.

Die plaser beskryf die bewering as “gewensdenkery” en voeg by: “Ek voel vir haar.”

Die vrou word ook daarvan beskuldig dat sy pamflette op ’n onaanvaarbare manier versprei. “Gooi dit net in die wind deur haar motorruit,” beweer die klaer.

Die plaser, wat volgens Observer ’n kandidaat van ’n ander politieke party is, word vervolgens aangespreek oor die verspreiding van pamflette. “In hierdie wyk plaas ons pamflette netjies in ’n hek,” lui die boodskap.

“Dit is rommelstrooiing en ons sal nie die optrede in Wyk 14 duld nie,” sluit die plasing af.

Vermooten het haar sedert haar herverkiesing verlede week ook teen die kandidaat se optrede uitgespreek.

In ’n afsonderlike voorval het ’n anonieme inwoner Observer geskakel om navraag te doen oor die relatief min VF Plus-plakkate wat voor die verkiesing in die omgewing opgehang is.

Die inwoner het vermoed dat die plakkate moedswillig verwyder is. Daar is egter geen bevestiging hiervan nie.

Munisipaliteite se reëls oor die verwydering van verkiesingsplakkate verskil. Die algemene tydperk vir die verwydering daarvan is 21 dae ná die verkiesing.

Indien ’n munisipaliteit self plakkate moet verwyder omdat politieke partye versuim om dit te doen, kan die betrokke partye ’n boete opgelê word.

Daar is reeds die afgelope naweek begin om verkiesingsplakkate te verwyder.