Dis nou so maklik om by huise in te breek, selfs kinders kan dit doen!

Margareth Swartz van Kanonkop het ’n “snaakse voorwerp” in hulle erf gekry na ’n diefstal.
Dit het later geblyk diewe het die voorwerp gebruik om hulle sekuriteitshekke oop te sluit.

Die gesin se solarligte is oor die naweek gesteel en die dief het waarskynlik toe die voorwerp laat val.

Hulle was gister in die erf besig toe hulle die stokkie met twee skroewe op in die tuin gekry het.

“Toe ons die ding optel, het my 12-jarige seun gesê dat hy toevallig ’n video op YouTube gesien het van hoe soortgelyke voorwerpe gebruik word om slotte oop te sluit.”

Hy het toe die sekuriteitshek oopgesluit en later ook, om te wys hoe maklik dit is, die bure se sekuriteitshek oopgesluit.

“Ons het ’n lid van die GPF in kennis gestel van die geval, en toe wys hy vir ons dat ’n gewone sleutel ook hierdie sekuriteitshekke kan oopsluit.”

Margareth het gesê dat die diewe veral tydens beurtkrag baie aktief in hulle area is.

• Joe van Rooyen, van GPF Sektor 4, het bevestig dat hulle ’n toename in misdaad beleef, maar dat hierdie voorwerp die eerste geval is waarvan hy kennis dra.