Mnr. Hennie Fourie vertel dat groot gedeeltes van Waterval-Boven vanaf 19:00 gisteraand sonder krag was weens kabeldiefstalle.

Vroeg vanoggend het hy gesien hoe drie verdagtes oor die spoorlyn loop met groot rolle kabels en het gewonder of dit nie iets te doen het met die kragprobleem nie (die spoorlyn loop naby sy huis verby).

Hy het dadelik vir rdl. Amanda Botha (DA raadslid) daarvan in kennis gestel, wat op haar beurt vir Robert van Wyk (JHD Protection Services) gekontak het.

Mnr. Van Wyk het mnr. Fourie opgelaai en hulle het omgery N4 se kant toe, aangesien die drie verdagtes in daardie rigting gehardloop het.
Rdl. Botha het ook haar seun, Jaco, en nog ’n inwoner, mnr. André Grové, gestuur om te help.

Die boewe het hul morsdood geskrik toe hulle al die manne gewaar, waarop hulle al die kabels neergesmyt en laat spaander het na die woongebied langs Waterval-Boven.

Rdl. Botha het die kabeldiefstalle aangemeld en is gevind dat dit by Transnet (spoorweg) gesteel is.
’n Ingenieur is in kennis gestel en die kabels aan hulle oorhandig.

Rld. Botha het met ’n stemboodskap almal betrokke bedank vir hulle vinnige reaksie.

“’n High five vir al die die manne. Baie dankie, julle maak ons trots!”

•JHD Protection Services is ’n sekuriteitsfirma op dié dorp.