Mnr. Kabelo Setlhodi het pas sy hond kom haal by mnr. Arthur Hill, van die Dagpatrollie.
Tank het uitgekom vroeër vanoggend by hul erf in Klaseriestraat (Aerorand) en hy het vir bykans ’n uur in die omgewing rondgery om sy hond te kry.
Mnr. Setlhodi het op die gemeenskapspolisiëringsforum se Sektor 3-groep gevra dat almal vir sy hond moet uitkyk.
Mnr. Hill het ook van die verdwyning van die hond te hore gekom en die area gefynkam.
Op die hoek van Oranje- en Van der Merwestraat (naby Vergeet-My-Nie) het hy die hond opgemerk wat met ’n USB-kabel aan ’n boom vasgemaak is.
“Dit is daar waar hulle die meubels op die oop stuk erf verkoop. Die een ou wou nog die hond aan my verkoop vir R200, maar ek het vir hom gesê dit is iemand se hond en ek gaan hom nie betaal nie,” sê mnr. Hill.
“Jy moes sien hoe het Tank baklei om los te kom van die kabel. Hy was so bly om my te sien en ek maak hom los,” het mnr. Hill omgekrap gesê.
•Hy het mnr. Setlhodi gebel en voor die Middelburg Observer se kantore gekry om die hond terug te gee.
