News

Internasionale model Lené steeds op piek van loopbaan

Om op 32 op die piek van ’n internasionale modelloopbaan te bly, is nie maklik nie, maar Lené Gouws geniet steeds elke oomblik daarvan.

April 6, 2024

Daleen Naude 2 minutes read

Lené het onlangs weer op die voorblad van ‘n tydskrif verskyn en is haar ouers, Nico en Ena van den Berg (van Middelburg) baie trots op haar. Lees meer daaroor in die Vrydag uitgawe van die Middelburg Observer.

Terwyl dié oud-leerling van Laerskool Middelburg en HTS Middelburg met vliegtuie en treine tussen fotosessies rondrits, het sy so tussen haar besige skedule deur, uit die koue London, ons vrae geantwoord.

“Ek is jaloers op die lekker warm weer daar (in Middelburg). Ons kry nog lekker koud in Europa,” begin sy geselsend te antwoord.

Op die vraag of sy weet die hoeveelste keer dit is dat sy op ’n voorblad van ’n tydskrif verskyn, sê sy dat sy al opgehou tel het.

“Maar dis nog steeds ’n lekker gevoel as ek van my werk gepubliseer sien. Ek plaas gereeld op Instagram my werk en al my reise.” (Gaan volg haar gerus op Instagram by @lene_gouws).

Een van haar plasings op Instegram:

https://www.instagram.com/reel/C2uPzYOqI3B/?igsh=MTJkZ2llZjk5enY1cA==

Dit is hierdie jaar haar 10de jaar in die bedryf. Sy het modelwerk een jaar deeltyds gedoen terwyl sy haar studies voltooi het en daarna nege jaar voltyds. “Ek kan nie glo die tyd het so gevlieg nie!”

Sy is in Desember in Stellenbosch getroud met Wiehahn Gouws (’n geoktrooieerde rekenmeester, wat ook sy MBA verwerf het, wat vir Siemens in Duitsland werk).

’n Mens wonder of dit nie nou moeiliker is om met haar loopbaan voort te gaan, terwyl sy getroud is nie.
“Inteendeel, dit is vir my makliker.” Sy sê haar man is “ongelooflik ondersteunend” en motiveer haar altyd om haar drome na te jaag.

“Ek het altyd van een land na die volgende gehop en nou is dit so lekker om terug te kom huis (Munich, Duitsland) toe na my veilige plek.”
Lené meld dat hy haar stabiliteit bied, wat sy nooit voorheen daar gehad het nie.

“50% van my werk is in Munich, so ek is darem meeste van die tyd by hom, anders geniet ons naweke of trippies na ander lande toe saam. Hy geniet reis en toer net so baie soos ek.”

Op 32 lyk sy baie jonger as modelle veel jonger as sy en om so slank en fiks te bly, verg sekerlik baie harde werk?
“Ek is baie gelukkig dat die aard van my tipe fotosessies, byvoorbeeld vir vel, gesondheidsprodukte, modekatalogiste en TV-advertensies altyd ’n mark het vir ’n bietjie ‘ouer’ of meer volwasse gesig.”

Lené Gouws het ‘n besondere natuurlike skoonheid.

Sy noem dat sy vroeg in haar lewe begin het om ’n goeie velsorgroetine te volg en geniet dit om gimnasium toe te gaan en aktief te bly.
“Ek probeer om ten minste vier keer ’n week gimnasium toe te gaan, afhanged van my skedule, maar ek glo dis baie belangrik om ’n balans te hê. As ek lus is vir iets, eet ek dit en weerhou myself nie van enigiets nie.”

Hulle beplan om “definitief met ’n gesin te begin in die nabye toekoms en ek hoop om nog modelwerk te kan doen, selfs na ek kinders gekry het. In baie van my werk speel ek die ‘ma’-rol.”
Volgens haar kom daar binnekort ’n advertensie uit vir Checkers se nuwe klerereeks (UNIQ), “waar ek hoeka die ‘ma’ speel.”

Lené is ‘n gesogte internasionale model.

Om op die piek van ’n droomloopbaan te bly, is beslis harde werk en haar raad aan jong vroue om volhoubaar in die bedryf te bly, is “om jouself nie te probeer verander om in ’n sekere boksie te pas nie. Die Here het ons elkeen perfek na Sy wil geskape.”

Sy stel voor as meisies belangstel in die modelbedryf, moet hulle kyk wat hulle sterk punte is en dan bepaal in watter ‘mark’ hulle goed sal werk soos loopplank of kommersiële modelwerk.