Vyf beskuldigdes het vandag vlugtig in die hof verskyn en is die saak uitgestel, nadat ’n R2 miljard dwelmlaboratorium op 19 Julie op ’n plaas buite Groblersdal deur die Valke oopgevlek is.

Die polisie het beslag gelê op 408,95 kg asetoon en kristalmetamfetamien en die beraamde waarde van die dwelmlaboratorium is R2 miljard.

Die plaaseienaar van Thaba E Monate, Roelof Frederik Botha (57), het saam met vier ander beskuldigdes, Simphiwe Melvin Khumalo (34), Alejandro Gutierrez Lopez (43), Jorge Humberzo Gonzalez (53) en Ruben Vidal Rodriguez (44), in die hof verskyn.

LEES HIER: Video: Vyf wat aangekla word oor R2 miljard dwelmlaboratorium nou in hof

Hulle staan almal tereg op klagtes van die vervaardig van onwettige dwelmmiddels, handeldryf in die middels, of alternatiewelik die besit daarvan, en geldwassery.

Lopez, Gonzalez en Rodriguez, Meksikaanse burgers, het voorlopig hul aansoeke om borgtog laat vaar, terwyl Botha en Khumalo hul aansoek om borgtog voortgesit het.

Die borgtogaansoek van Botha en Khumalo het reeds op 1 Augustus begin, maar weens te min tyd is die saak uitgestel na vandag vir slotbetoë.

Landdros Bogi Mashele het vandag gesê dat hy die ondersoekbeampte in die saak weer na die getuiebank roep vir “meer duidelikheid” oor sekere aspekte.

Hy het die ondersoekbeampte, sers. Ntutu Monene, gevra of foto’s op die toneel geneem is Sers. Monene het daarop gewys dat daar wel foto’s geneem is, maar dat dit steeds by die forensiese span is, en gewoonlik eers na ’n maand vrygestel word.

Hy het aangedui dat hy dit moontlik kan kry, as die hof daarop aandring.

Landdros Mashele het die saak uitgestel na Dinsdag, 13 Augustus, vir die verkryging van die foto’s van die toneel, aangesien hy ’n “dit as ’n noodsaaklikheid benodig vir die hof om ’n ingeligte besluit te neem.”