Die agtjarige Lemay Fouché is sedert die naweek weer op die asemhalingsmasjien (ventilator), omdat haar asemhaling nie heeltemal gestabiliseer het nie.

’n Gebedsbyeenkoms is verlede Woensdag vir Lemay gehou op die hoek van Oribi- en Lilian Ngoyistraat, bokant Laerskool Kanonkop, waar Lemay ’n graad twee leerling by dié skool is. Sy het ernstige beserings opgedoen in ’n ongeluk, wat die lewe van haar pa, Mornay, geëis het.

Na die byeenkoms het haar toestand sodanig verbeter, dat dokters verwonderd gestaan het oor haar beterskap.

Lees ook: Dokters verwonderd oor klein Lilie se beterskap

Gedurende die naweek het haar familie almal laat weet dat sy gesedeer is vir pyn. ’n Dreineringspyp is in haar regterlong gesit en is sy weer na die operasie op die asemhalingsmasjien gekoppel.

Sy het intussen ook bloedklonte in haar long ontwikkel.

In een van die laaste boodskappe is daar gesê “dat die dokter na haar longetjies geluister het en sê dit klink goed.”

Daar is ook gemeld dat die dokter deur die nag na haar sal kyk en more sal besluit of die dreineringspyp verwyder gaan word.

“Hulle stoei net met Lemay se koors.”

Aan die einde van die boodskap is gesê: “Ons waardeer almal se volgehoue gebede en geloof. Dis julle ondersteuning wat ons stande hou, dankie.”