Video: Hekmotordiewe skrik nie vir honde óf alarms!
Twee groepe hekmotordiewe het laasnag in Middelburg toegeslaan!
Hekmotordiewe het laasnag voor die voet by erwe in Gholfsig, Dennesig en Kanonkop ingestorm en binne sekondes met hul buit weggekom.
By een van die huise het die diewe nie eers geskrik vir die honde se geblaf of ’n skreeuende alarm nie.
Tydens die hekmotordiefstalle in Gholfsig is ’n klein wit karretjie gebruik. Videomateriaal wys dat die diewe in Kanonkop en Dennesig in ’n silwer voertuig gery het.
Interessant om te meld dat tydens die vorige hekmotordiefstalle in Gholfsig sowat drie weke gelede, het een van die diewe wit tekkies gedra. Kringtelevisiemateriaal by een van die huise waar hekmotors gesteel is in Kanonkop, wys duidelik dat een van die boewe ook wit tekkies gedra het.
@middelburgobserver Thieves steal gate motor in 10 seconds, not worrying about dogs barking and alarms going off. There is a spike in gate motor thefts in Middelburg (Mpumalanga) and residents are urged to be alert.
Sy makker het ’n rooi sweetpakbaadjie gedra. Verlede week het twee diewe ook toegeslaan in Kanonkop en het hulle balaklawas aangehad. Een van dié diewe het ook ’n rooi sweetpakbaadjie gedra.
Volgens Dagpatrollies is daar toegeslaan by die volgende huise in Kanonkop en Dennesig laasnag: drie huise in Colleystraat (waarvan een onsuksesvol), twee in Sipres (een nie suksesvol) en een in Impala. In Gholfsig is hekmotors gesteel in Langenhoven-, Liepoldt- en Cowen Ntulistraat.
Lede van Dagpatrollie het vanaf kort na 02:00 tot 04:00 heen en weer gejaag nadat daar op hul WhatsApp noodgroep gevra is vir hulp, omdat hekmotordiewe opgemerk is. Die booswigte het egter weggekom.
