Wreedaards vergiftig weer honde in Kanonkop en Dennesig
Inwoners van Kanonkop en Dennesig moet lig slaap, want gifstrooiers wat honde teiken, het laasnag in Kanonkop én Dennesig toegeslaan.
Vier honde is laasnag vergiftig!
In Harry Gwalastraat (Dennesig) is drie van die Joubert-gesin se honde vergiftig.
“Dis verskriklik, daai gesig as jy buite kom en hulle lê daar dood!” het Hanlie Joubert magteloos kwaad uitgeroep.
Sy het hartseer gesê dat alhoewel hul honde kwaai was, hulle nog nooit iemand gebyt het nie. “Hulle het ons net beskerm!”
Haar hart breek as sy dink hoe wreed Beer, Buffy en Covi dood is. Dit is ’n Shar Pei,, ’n staffordshire en ’n Duitse Herdershond. Beer en Buffy het elke oggend saam met Willow, haar kleindogter, skool toe gery.
In Wag n Bietjiestraat (Kanonkop) is Tyson, ’n Skotse skaaphond (border collie), vergiftig.
Belinda Vorster sê hulle het dié vriendelike hond maar twee weke gelede eers gekry toe sy eienaars oorsee is. “Hy het gehou van cuddle en drukkies en was baie liefdevol.”
Vroeg in Agustustus is drie staffordshire honde in Proteastraat (Kanonkop) vergiftig.
Deur die jare is daar letterlik al tientalle honde in Middelburg vergiftig. In die meeste gevalle is die honde in die omgewing vergiftig om stil te maak om motorfietse te steel.
- As jou honde vergiftig is of jy weet van enige ander misdaadverwante voorvalle in jou area, stuur vir ons ’n WhatsApp na 072 248 3855, sodat ons die gemeenskap kan inlig waar die brandpunte is.
