Huurders van woonstelle in Groenkol het byna van hul beddens afgeval met ‘n hengse slag toe ‘n voertuig in die vroeë oggendure deur ‘n muur gery het.

Na wat verneem word het die ongeluk omstreeks 02:45 op die hoek van Marico- en John Magagulastraat gebeur.

‘n Landrover het opgery in Hoogstraat en waar die straat verander in Maricostraat deur ‘n woonstelblok se muur gebars.

Met insleepdienste en die polisie se aankoms op die toneel, was die bestuurder van die voertuig nie meer daar nie. Daar is riemtelegramme dat hy moontlik met ‘n privaat voertuig na ‘n hospitaal geneem is vir behandeling. Ander bronne het gemeld dat hulle ‘n man kort na die ongeluk sien wegloop het vanaf die toneel.

• • As jy weet van enige ongelukke of ander probleme op paaie, soos groot slaggate, stuur ‘n WhatsApp boodskap (met foto of video, indien moontlik) na 072 248 3855.