Die kerk en die bar is langs mekaar…

’n Sent vir die kerk…

…en ’n rand vir die bar…

Dit was Groep Twee wat gesing het van die kerk en die bar, ahummm, ahummm…

Deesdae kan dit selfs verander word na “die kerk en die sirkus is langs mekaar”.

Of selfs; “die kerk en die sekswinkel is langs mekaar…”.

Op Bellville was daar op ’n stadium ’n kerk langs ’n sekswinkel en nog een langs ’n kroeg.

Op Cullinan is daar in die skadu van die ou Anglikaanse kerkie ’n sirkus aangebied.

Voordat lesers die Aksie Morele Standaarde op ons sit, die kerkie op Cullinan is eintlik ’n mooi storie.

’n Storie van ’n groot voorry wat vir Suidoos-Transvaal in die skrums gesak het (wat deesdae meer soos Kersvader lyk met sy lang wit baard) en ’n kerkie wat deur sir Herbert Baker ontwerp is

Jan Erasmus het in 1984, 12 wedstryde vir Suidoos-Transvaal gespeel.

Hy is deesdae die eienaar van die ou Anglikaanse Kerkie op Cullinan.

Die kerkie is deur sir Herbert Baker ontwerp, in 1904 gebou en die hoeksteen is in 1908 gelê.

Baker was vanaf 1892 tot 1912 ’n vooraanstaande argitek in Suid-Afrika en het ook die Uniegebou ontwerp.

Toe die kerkie in 2018 in die mark kom, het Erasmus dit aangeskaf en langsaan ’n perseel opgerig, waar Mom’s Grill deesdae bedryf word.

Daar was al selfs ’n sirkus in die gebou aangebied waar narre en sweefstok artieste mense  vermaak het.

Voordat die kerkie van hande verwissel het, het ’n biskop dit “ontheilig”.

Sedertdien waak die joviale ou rugbyspeler oor die kerkie soos ’n stut oor ’n skrumskakel.

“Die kerkie is nog soos in 1909, die houtvloere word gereeld met olie gesmeer en ons het alles net so behou.”

Maar soos ander kerke het hy al meer as net in die skrums gesak met die land se misdaad.

“Het jy al gehoor ’n teerpad word gesteel?”

Oaklaan, wat voor die kerkie en restaurant verby loop, is geteer. Een oggend is al die teer bymekaar gemaak en weggery.

Toe Cullinan sakelui navraag doen by die Tshwane stadsraad moes hulle uitvind die teerpad is gesteel!