Middelburg se Anja Tromp is gekies vir die Suid-Afrikaanse o/21 hokkiespan wat vanaf 1–13 Desember aan die FIH vroue junior wêreldbeker in Santiago, Chile, deelneem.
Die jong Suid-Afrikaners stap vir die negende keer die wêreldverhoog binne ná ’n indrukwekkende kwalifiseringsveldtog waarin hulle vroeër vanjaar as Afrika-kampioene gekroon is.
Tromp was in Laerskool Middelburg en het in 2023 aan Hoërskool Menlopark gematrikuleer. Haar hokkie loopbaan het by die The Hockey Farm, net buite Middelburg begin, wat ‘n groot aandeel in haar sukses deel. Sy was van kinderdae reeds ‘n ‘hokkie-bokkie’ en reeds op laerskool vir die Mpumalanga A-span gespeel. Later was Tromp boonop in Hoërskool Menlopark se Eertste Hokkie-span en sy het verskeie kere Mpumalanga verteenwoordig op die Indoor veld. Sy was óók ‘n staatmaker in die Northerns Blues Provinsiale Hokkie-span en die SA Skole O/18 A-span, waar is aangewys was as speler van die toetsreeks.
Sy vorm deel van ‘n span wat uit ’n sterk groep sewe terugkerende spelers, insluitend die Olimpiese sterre Paris-Gail Isaacs, Ntsopa Mokoena en Taheera Augousti bestaan. Suid-Afrika is in Groep D saam met Oostenryk, China en Engeland – ’n groep waar ’n vinnige, soliede begin van groot belang is. Die 2025-toernooi spog met 24 spanne, wat beteken dat elke punt gaan tel, om die pad na die uitspeelrondes te laat vorder.
Dié hokkielegende se pad na die Wêreldbeker was verseker nie sonder slaggate nie. Tromp het in 2023 beserings in albei haar voete opgedoen en moes gevolglik skouer aan die wiel sit om haar drome te bewaarheid.
Tromp se reis is reeds ’n reuse triomf, máár haar grootste oorwinnings lê waarskynlik nog voor. Al die aksie – insluitend. Haar debuut op die internasionale verhoog – sal regstreeks op Watch.Hockey gestroom word.
Verdere besonderhede word binnekort bevestig.
