Gaan Gustav Basson die naweek koning kraai by Karel Kat?
Die oud HTS Middelburg leerling, wat die laaste klompie jare sy brood en botter verdien as professionele fietsryer, het ingeskryf vir die provinsiale kampioenskappe.
Hy ry in die kleure van Gauteng.
Vyf provinsies waaronder Mpumalanga, Vrystaat, Noordwes, Limpopo en Gauteng neem aan die kampioenskappe deel.
Daar word egter afsonderlike prysuitdelings vir elke provinsie gehou.
’n Plat roete van 18 kilometer, met goeie teeroppervlak, word gebruik.
Deelnemers gaan verskillende rondtes ry, afhangende van hulle ouderdomsgroep.
Die wegspring is by Karel Kat trouvenue in Mapleton (Boksburg).
Basson (Tshenolo pro span) kan kwaai kompetisie in die elite afdeling verwag met nog ’n oud Middelburger, Thokozani Mahlangu (Tshenolo), Casper Kruger en Reinardt Janse van Rensburg (Tshenolo), wat ook ingeskryf het.
Hy gaan aan beide die tydtoets (Saterdag) en padwedren (Sondag) deelneem.
’n Interessante naam in die vroue afdeling is oud Middelburger Magda Nieuwoudt in die kleure van Gauteng.
Sy het ’n skitterende RideJoburg agter die rug, waar sy ’n derde plek losgery het.
Na haar heldedade in die Munga-uitdaag, moet sy sterk genoeg wees om haar man tussen die top vroue te staan.
Die oor 70 veteraan wat sy plek verlede jaar oopgetrap het na die Suid-Afrikaanse kampioenskappe, Len Sutton, se naam verskyn ook op die inskrywingslys vir die tydtoets en padwedren. Hy neem vir Mpumalanga deel.
Jong Keira Botha, nog ’n oud HTS Middelburg leerling, het vir die padwedren ingeskryf in die vroue o/23 afdeling.
Nelspruiter en Protea fietsryer wat aan die wêreld fietsry kampioenskappe in Rwanda deelgeneem het, Megan Botha, gaan in die selfde afdeling in beide die tydtoets en padwedren trap.
Sy is na haar skoolloopbaan by Hoërskool Nelspruit ’n kontrak deur Tshenolo vroue pro fietsry span aangebied maar ry steeds vir Mpumalanga.
