’n Mens kon die opgewondenheid aanvoel tussen die graad een leerlinge wat hul eerste dag by Laerskool Staatspresident C.R. Swart begin het.

Die skoolterrein was ’n warboel van groot glimlagte, netjiese uniforms en klein handjies wat styf aan ouers se hande vasgeklou het.

Onderwysers het die graad eens verwelkom en elke leerder persoonlik ontvang, wat die oorgang van die ‘klein skool’ na die ‘groot skool’ soveel makliker gemaak het. Die fokus vir die eerste dag was om ’n veilige, positiewe en bemoedigende omgewing te skep waarin kinders kan groei en floreer.

Volgens die skool se leuse, “Ons bou aan die beter as die beste jy,” plaas hulle die klem op karaktervorming, selfvertroue en ’n liefde vir leer. Dit is waardes wat reeds van dag een af sigbaar is.

Vir ouers was dit ’n emosionele oomblik, maar ook een gevul met trots en hoop. Vir die kinders was dit eenvoudig ’n groot avontuur met baie maatjies, nuwe juffrouens en ’n wêreld vol ontdekkings wat voorlê.