Daar is weer lopende water by die King Nyabela Hospitaal nadat daar vir meer as ’n week nie water was nie, maar pasiënte moet steeds met koue water bad.

Verlede week is berig dat daar nie lopende water was by dié hospitaal nie, maar die munisipaliteit het ingegryp en watertenks neergesit.

’n Paar pasiënte het egter laat weet dat hulle nie toegang gehad het tot dié water nie en dat hul families vir hulle in bottels water moes bring om te was.

Vanoggend het ’n pasiënt laat weet dat hulle wel lopende water het, maar dat dit steeds koud is.

• Die Observer het twee weke gelede al navraag gedoen by die Departement van Gesondheid oor die bewering dat die ketel (boiler) wat die warm water moet voorsien buitewerking is. Ook dat die masjien wat teatertoerusting moet steriliseer, stukkend is. Ontvangs van die navraag is erken, maar daar is nog nie antwoorde verskaf nie.
• Al die klagtes van die laaste paar weke is ook aan die Menseregtekommissie gestuur, wat laat weet het dat hulle besig is met ’n ondersoek. Van die klaers is ook reeds gekontak.