Gert Human (66), wat vir jare bekend was as ‘n geliefde houtwerkonderwyser by Hoërskool Middelburg, is gisteroggend oorlede nadat hy vir maande gehospitaliseer is.

Sy suster, Leo Whitfield, sê sy hy het die laaste paar maande teen ‘n infeksie geveg na ‘n hartklepvervanging.

Hy het aanvanklik verlede jaar gekla oor pyn in sy rug en was aanvanklik in die Life Midmed Hospitaal. In Julie verlede jaar is hy na die Kosmos Hospitaal, waar hy behandeling ontvang het tot in September, waarna hy per helikopter oorgeplaas is na die Unitas Hospitaal.

Leo vertel dat hy in 2023 ‘n hartklepvervanging gehad het en dat hy weer ‘n soortgelyke operasie in die Unitas gekry het. Hy het ook ander operasies ondergaan in die tyd wat hy in die hospitaal was.

Leo het ‘n groep gestig kort nadat hy in die hospitaal opgeneem is en het die lede tot meer as 100 gegroei. “Gert het baie vriende in Suid-Afrika en van regoor die wêreld gehad. Ek kan nie genoeg dankie sê vir almal se ondersteuning nie. Dankie ook vir almal wat hom gekontak en gaan besoek het.”

Gert was welbekend in Middelburg waar hy as onderwyser vriendskapsbande gesmee het met onderwysers, ouers en kinders. Later het hy by ‘n myn gewerk en toe hy daar weg is het hy vir twee maatskappye opleiding gedoen. “Gert het nooit afgetree nie!” meld Leo.

As sy hom moet beskryf, onthou sy met ‘n glimlag dat “Gert op sy gelukkigste was as hy saam met almal kon braai!” Haar broer het homself ook baie keer tekort gedoen om ander te help. “Hy het so ‘n goeie omgee-hart gehad.”

Sy het dosyne name opgenoem van vriende wat tot met sy afsterwe goed bevriend was en gereeld vir hom gaan kuier het.

Gert word oorleef deur sy susters Yvonne en Leo en broers Chris (beter bekend as ‘Koevoet’) en Pieter.

• Daar sal Maandag begrafnisreëlings getref word.