Saggeaarde Marius het ‘n groot hart vir diere, veral sy katte, gehad
'n Inwoner van Middeburg wat mense se harte aangeraak het met sy saggeaarde persoonlikheid, is verlede week oorlede.
Marius Degenaar 49, ’n bekende gesig in die dorp en geliefde by familie, vriende en kollegas, is op 27 Januarie oorlede.
Marius het vir ongeveer 20 jaar by Packsolve gewerk en moes onlangs as gevolg van gesondheidsredes ophou werk.
Hy sal onthou word as ’n sagte, rustige mens met ’n groot hart vir diere – veral sy katte, wat sy lewe was.
Hy was vir jare iemand wat graag oral te voet in die dorp beweeg het toe sy gesondheid dit nog toegelaat het.
In die laaste paar jaar het hy egter swaar begin loop, maar het steeds sy vriendelike geaardheid behou.
Marius het diep spore gelaat by almal wat hom geken het en sal met liefde onthou word deur vriende en familie.
’n Gedenkdiens ter nagedagtenis aan Marius word vandag (6 Februarie) om 10:00 vanuit die Kapel by die ICSA Kapel (begraafplaas in Samora Machelstraat) gehou. Ds. Jaco van Rooyen sal die diens lei.
