“As dit nie vir hierdie graf was nie, het ek dalk nie bestaan nie!”
Erik Botes het Woensdag die graf van sy oupa besoek.
Die graf waarop daar staan: “Groter liefde het niemand as dit, hy het sy lewe vir sy kind gegee”.
Daardie kind was Erik se ma, Suzette Botes.

Op 16 April 1950 het ’n onderwyser van die Botshabelo sendingstasie, Frederik Bukes (49), besluit om sy gesin na ’n kerkdiens op ’n uitstappie na Belfast te neem.
Agt kilometer buite Middelburg het hy gestop om na die staalspoorwegbrug te stap, saam met sy twee kinders, Ferdie (11) en Suzette (4). Sy vrou, Cillie (42), het in die kar gewag en Marita (8) het besluit om tuis te bly.

Klein Ferdie het opgewonde saam met sy pa vooruit gestap met Suzette wat agterna kom.
’n Trein het vanaf nêrens aangestoom gekom.
Frederik het vir Ferdie geskreeu om van die brug af te hardloop.

Binne sekondes moes Frederik besluit om soos sy seun na veiligheid te hardloop… of sy dogtertjie se lewe te red.
Hy het Suzette in sy arms opgeraap en haar styf teen sy bors vasgedruk, terwyl hy van die brug spring.
Tydens die sprong het hy Erik se ma tussen die pilare van die brugkonstruksie ingegooi. Frederik het na sy dood geval.
Suzette het ernstige beserings aan haar lip en rug opgedoen, maar oorleef.
Sy is op 19 April 2004 in Bloemfontein oorlede, na ’n rugoperasie.

By die graf van Frederik Scheuble Bukes, gebore op 4 Junie 1900, oorlede op 16 April 1950, het die Middelburg Erfenisvereniging een van sy bloubordjies opgesit. Wanneer die QR-kode op die bordjie, in die ou begraafplaas, skandeer word, kan lesers die verhaal lees en daar is ook verskeie foto’s.

Botes, wat in Pretoria woon, het namens sy familie die erfenisvereniging bedank, dat hulle sy oupa se merkwaardige verhaal op hierdie wyse gedokumenteer het.

KYK HIER:

@middelburgobserver

KYK: Kleinseun besoek oupa wat sy ma se lewe gered het, se graf. Lees meer: #middelburgobserver #middelburg #mpumalanga

♬ original sound – MiddelburgObserver – MiddelburgObserver