Die gewetenlose rampokkers wat grafte omgeskop het, het nie op graniet getrap nie, maar op mense se harte.
Mense van vlees en bloed.

Daar word gesê; wanneer jy ’n kind se naam noem, is dit nie om ouers te herinner dat hy oorlede is nie, maar dat hy gelewe het…dat hy lewe…
Dit is presies wat die afgelope week gebeur het.
Uit die hartseer is daar herinneringe opgediep.
Meer nog, goedheid en omgee, het geseëvier.

Die geliefde afgetrede bankbestuurder, Altus Nelson, se tweeling dogtertjies se graffie is ook geskend.
Hy en sy vrou, Charlotte, het besluit om nie weer eendagoud Chane en Chanelle se graffie te herstel, deur die kopstuk terug te plaas nie. ’n Engeltjie wat op die graffie was, is ook voorheen beskadig. Die identiese tweeling is in 1994 vroeggebore en het net ’n dag gelewe.

Dinsdagaand was die Nelson egpaar verstom, toe hulle ’n foto ontvang, van die graffie wat reggemaak is.
Toe hulle hoor van die verwoesting het Maureen en Carl Haynes, van Mid-Oos Grafstene, gaan ondersoek instel en op 54 beskadigde grafte afgekom.
Hulle het gister begin om die grafte gratis te herstel.
Hulle gaan selfs nuwe wit klippies op die graffies terug plaas.

Johann Hatting, wie se dogtertjie in 1991 oorlede is, is ook na die begraafplaas.
Hy sê “31 Desember 1991 sal my altyd bybly. My lewe verander in ’n oogwink.”
Toe hy gister by die begraafplaas stop en besef sy dogtertjie se graf is ook geskend “is daar ’n stuk uit sy menswees geruk”.

“Ons gaan gereeld na haar graffie toe, om blomme daar neer te sit. Toe ek die beskadigde graf sien, het ek diepe hartseer ervaar.”
Sy vertroosting was toe hy besef dat daar nog goeie mense op die dorp is.
“Carl en Maureen was saam met hulle span hard besig was om die graffies te herstel.”
*Klein Mariëlda het op 31 Desember 1991 by De Voetpadkloof verdrink.
Op haar graffie se kopstuk staan daar “Bekkie ons mis jou”.

Mid-Oos Grafstene sou vanoggend terugkeer om nog grafte te herstel.

• Indien daar enigiemand is met inligting oor wie die grafskenders is, skakel Tobie van den Bergh by 0722 01 568. ’n Beloning word aangebied.

Lees ook:

Vrou begin huil toe sy flenter graffies sien

KYK: Talle grafte gevandaliseer oor Paasnaweek