Hy was ’n legende wat in sy jare diens vele mense gehelp en ondersteun het Blackie Swart (76) was ’n polisieman in murg en been. ’n Polisieman in die tyd toe polisiemanne nog polisiemanne was.
In ’n tyd waar daar nie nonsens gevat is van kabouters nie.
Om te sê Blackie was in die sewentiger- en tagtigerjare ’n legende op Witbank, is om dit sagkens te stel.
Hy het saam met sy polisie kollega, Lieb Liebenberg, vele wedstryde vir Witbank Rugbyklub uitgedraf. Blackie op voorry en Lieb op slot.
Met sy dik snor en lyf van ’n voorry, het hy op en van die veld af, gesag afgedwing. Dit was ook ’n tyd waar ’n polisieman meer as die ou in blou uniform en polisie bakkie was. In daardie rol het Blackie met sy sagte hart en imposante figuur, ’n groot rol gespeel in inwoners se lewens.
Daar is dikwels by Blackie aangeklop om hulp. Hy het 45 jaar aktiewe diens by die selfde polisiestasie gehad. Maar nou is Blackie dood.
Hy is vanoggend, 21 April 2026, om 5:00, oorlede aan ’n hartaanval. Volgens sy familie het hy ook vir Suidoos-Transvaal en die B-span, die Blesbokke, uitgedraf.
Hy laat drie kinders Wayne, Sumarius en Suretha agter, skoonseun Dion en skoondogter Lesley, kleinkinders Daniella, Matthew, Ankia, Ashley, Dione, Clarissa en Nicus.
*Begrafnisreëlings sal later bekend gemaak word.
